Кој е Mikao Usui Sensei

• Кој е Mikao Usui Sensei?

    Usui Sensei e основач на Usui Reiki Ryoho, основачот на Shin Shin Kaizen Usui Reiki Ryoho.

 

               Овде во Школата за Применета Спиритуалност ја изучуваме вистината и историјатот за основачот на она што денес е погрешно, општо познато како “Реики“. За да не се повторувам премногу, овде ќе биде напишам само мал дел за животот и делото на Усуи Сенсеј. Но, многу повеќе и подлабоко разработени историски факти и проверени истражувања можете да пронајдете во мојата книга/прирачник “Знаења, размисли и факти за Реики, Усуи Сенсеј и Спиритуалните Учители“, како и во многуте други прекрасни книги на Реики историчарот и еден од најголемите познавачи и истражувачи на животот и делото на Усуи Сенсеј, Frank Arjava Petter, но и во уште неколку книги напишани од реномирани Реики Учители кои се потрудиле да ја пронајдат и да ја предадат вистината за оваа прекрасна техника на исцеление.

               Кој бил Усуи Сенсеј најдобро можеме да спознаеме од самата негова спомен-плоча која е подигната во негова чест, веднаш до неговиот гроб во Храмот Saihoji во Токио.

        И благодарение на подвизите на Arjava Sensei кој ја пронашол спомен-плочата и гробот на Усуи Сенсеј, овде за првпат преведено на македонски јазик, ви го претставувам натписот за неговиот живот и дело напишани од г-дин Juzaburo Ushida (првиот претседател на здружението по смртта на Усуи Сенсеј) на старојапонски јазик. Преводот којшто овде јас го преведувам е превод направен на модерен јапонски јазик од господин Hiroshi Doi, кој до ден денешен е член на оригиналното Usui Reiki Ryoho Gakkai во Јапонија (не дека другите преводи од останатите Реики-Учители не се точни, секако дека се, но овој го избрав како најпоетичен).

               Преводот којшто сега ќе го прочитате во заградите содржи дообјаснувања направени од моја страна за да можете подобро да сфатите за што станува збор.

• Reihochoso Usui Sensei kudoku no hi

• Memorial of the merits of Usui Sensei, the founder of Reiho (Reiki Ryoho)

• Спомен-плоча за заслугите на Усуи Сенсеј, основачот на Reiho (Reiki Ryoho)

       Тоа коешто природно ќе го научиш преку себедисциплина и тренинг се нарекува доблест, а кога си лидер и кога спасуваш луѓе од своја добра волја, правиш добро дело достојно за почести за коишто ти си заслужен. Личност која има многу вакви заслуги и карактерот ѝ е исполнет со доблести, еден ден може да стане почитуван основач и Учител на нешто свое. Уште од старо време оние кои основаа нови учења и религии – како што се еремитите, филозофите или гениите – се токму вакви луѓе. А ние, може со сигурност да кажеме дека Усуи Сенсеј е еден од овие величествени Учители.

        Тој основа нова метода за да се подобри работата на телото и на умот, којашто метода за своја основа ја има Реики од Универзумот. И уште веднаш, неговата репутација привлече луѓе од целата земја кои сакаа да научат Реики и да примат третман. Навистина, ова беше многу успешно (учењето на Усуи Сенсеј).

        Usui Sensei – чие име е Mikao, а неговиот псевдоним е Gyohan, беше роден во селото Тaniai, округ Yamagata, префектура Gifu. Негов прадедо бил Tsunetane Chiba, кој одиграл значајна улога како воен командант во периодот меѓу крајот на Heian ерата и почетокот на Kamakura владеењето. Името на неговиот татко бил Taneuji, но го викале Uzaemon. Неговата мајка беше од Kawai фамилијата. Usui Sensei беше роден на 15 август првата година од Keio периодот (1865 година). Бидејќи учеше додека работеше уште од дете, тој се потруди да биде доста понапреден од неговите пријатели.

        Откако порасна, отпатува и ги посети Европа и Америка и студираше во Кина. Но, и покрај сите неговите способности, не секогаш беше успешен во напредувањето во рамките на својата кариера. Иако честопати живееше сиромашен живот, во тие моменти уште повеќе се трудеше да се рафинира себеси како телесно така и умствено, без притоа да им подлегне на тешкотиите.

        Еден ден, Usui Sensei се искачи на планината Kurama каде што почна да практикува аскетска пракса со постење. Одеднаш, на дваесет и првиот ден, тој почувствува моќ на Reiki над неговата глава. (И тогаш) му беше подарено Satori и Reiki Ryoho во исто време. Кога ја проба (Реики-методата) на самиот себе и со неговата фамилија, веднаш се виде дека делува. Тој (Усуи Сенсеј) рече: “Јас морам да ја споделам оваа моќ со јавноста и да ги уживам бенефитите (од Реики) со нив, што е многу подобро отколку да го чувам (знаењето за исцеление со Реики) како ексклузивно право во мојата фамилија.“ Во април, во единаесеттата година од Taisho периодот (1922 година), Usui Sensei се пресели во Aoyama Harajuku, Токио и го основа својот Gakkai (институт) каде што Reiki Ryoho беше јавно подучувана метода, но имаше и третмани за исцеление. Луѓето кои доаѓаа да го видат, доаѓаа од близу и од далеку за да побараат од него водство и совети, како и лек и тие беа толку многу што можеа да се видат долги редици луѓе пред зградата на Gakkai.

        Во септември, во дванаесеттата година од Taisho-периодот (1923 година), во Tokio изби огромен пожар предизвикан поради Големиот Канто Земјотрес при што насекаде имаше повредени и болни кои многу патеа. Usui Sensei почувствува длабока симпатија кон нив и секој ден ги терапираше (со Реики-методата) кружејќи низ улиците на градот. Невозможно е да се пресмета колку многу луѓе беа спасени од смртта поради неговата посветеност. Ова е само еден мал опис од неговата мисија за исцеление каде што тој им ги подаде своите раце полни со љубов на сите оние кои имаа итна потреба (за исцеление).

        Кога неговиот Dojo стана премногу мал за да ги прими сите посетители, тој изгради нов Центар за Исцеление и се пресели во Nakano, надвор од градот, во февруари во четиринаесеттата година од Тaisho-периодот (1925 година). Како растеше неговата (позитивна) репутација, тој честопати беше покануван да гостува низ целата земја. И според овие покани, тој патуваше до Hiroshima, па потоа беше во Saga и стигна до Fukuyama. И додека таму (во Фукујама) престојуваше во еден мотел, ненадејно се разболе и умре на возраст од 62 години.

        Неговата сопруга Sadoko, (која потекнува) од Suzuki фамилијата, имаше син и ќерка со него. Името на нивниот син беше Fuji и тој го наследи фамилијарниот бизнис на Усуи.

Usui Sensei по природа беше мил и скромен човек кој никогаш не се фалеше себеси. Имаше цврст став (цврста градба) и на лицето секогаш имаше насмевка. Но, кога ќе се соочеше со тешкотии и предизвици, тој секогаш одеше напред со силна волја и храбро ги издржуваше, но сепак беше и крајно претпазлив. Тој беше човек со разновидни таленти и голем љубител на книгите кој имаше огромен фонд на знаења од многу области: историја, биографии, медицина и медицински науки, каноните на Христијанството, на Будизмот, како и психологија на натприродните способности на аскетите, проклетства, науката за дивинација и физиогномија. И поради ова, на сите им беше јасно дека мудроста и себедисциплината на Usui Sensei се базирани на целата негова кариера во областа на уметноста и науката и токму овие знаења и себедисциплината станаа главните поставки на Reiki Ryoho.

        Reiki Ryoho цели не само да се научи како да се исцелуваат заболувањата, туку и како да се поправи Kokorо; да се одржи телото здраво и да научиме како да уживаме во целата среќа којашто ни ја нуди животот преку нашата сопствена од Бога пратена способност. Поради ова кога ние го предаваме (Reiki Ryoho), прво што правиме е да ги оставаме Учениците да ја разберат последната инструкција (како да живееме) којашто Meiji Императорот ни ја остави (во наследство) и да ги рецитираат Go-kai секое утро и вечер, за да би можеле да живееат со нив и според нив.

        Go-kai гласи: Денес (само за денес) 1) немој да си гневен, 2) немој да си загрижен, 3) биди благодарен, 4) направи го тоа што треба да го правиш, 5) биди добар и праведен кон другите. Ова се навистина важни принципи за зголемување на мудроста и се исти како и оние (принципи на однесување), според коишто се трудеа да живеат старите мудреци и учители. Usui Sensei ги нарече Go-kai како тајната за живеење во среќа и радост и дека тие се чудотворниот лек којшто ги исцелува сите болести. (со ова) Тој јасно ни ја покажа неговата намера зошто треба да се научат Go-kai. И уште повеќе, тој се потруди да предава на колку што можеше поедноставно и појасно – така што, ништо коешто предаваше да не биде тешко да се разбере. Секојпат кога ќе седнаш во смирение и во Gassho и кога ќе ги рецитираш Go-kai наутро и навечер, ти си помагаш во развивањето на еден јасен и здраворазумски ум и токму ова е причината зошто треба да се практикува сево ова секој ден. Ова е причината зошто Reiki Ryoho е многу лесно прифатена од секого.

        Како што денешното општество е склоно на промени, така и човековите мисли се доста променливи. И ако (како што веруваме дека ќе се случи) успееме да го прошириме Reiki Ryoho насекаде, чувствуваме дека навистина може во многу да помогне за да се спречи луѓето да застранат во морална смисла. Нејзините бенефити (на Reiki Ryoho) се уште поголеми од едноставно исцеление на долгогодишни болести, хронични заболувања и лоши навики.

        Бројот на студенти кои научија директно од Usui Sensei се искачи на некаде околу 2.000 личности. Некои од неговите најдобри ученици од Tokio ја преземаат работата во негово име во dojo-то, додека останатите ученици кои живеат надвор од Tokio, исто така многу се трудат да направат сѐ што можат за да го популаризираат Reiki Ryoho. Иако нашиот Учител веќе премина, ние мораме (да најдеме начин) како најдобро да ѝ го пренесеме Reiki Ryoho на пошироката јавност и да го шириме (Reiki Ryoho) уште повеќе. Ах! Колку прекрасно нешто тој направи; тој многу дарежливо го пренесе она што самиот го доживеа!

        Како резултат на нашите неодамнешни средби и разговори, ние одлучивме да подигнеме спомен-плоча во гробиштата во фамилијарниот храм (на Усуи Сенсеј, Saihoji Temple) за да би можеле да ги споделиме неговите доблесни дела и да ги оставиме како аманет за идните поколенија; Јас бев замолен да го напишам епитафот на овој споменик. Бидејќи бев длабоко воодушевен од големите дела на нашиот Sensei и уште повеќе убаво изненаден од силната врска што ја имаат учениците со Usui Sensei, не се осмелив да ја одбијам оваа молба, туку ги напишав овие реченици на него (на споменикот). И токму затоа, од сѐ срце очекувам дека луѓето во иднина ќе гледаат во овој споменик со бескрајно воодушевување и длабока почит за нашиот Sensei.

Февруари, втората година од Showa-периодот (1927 година)

Едитирано од:

Masayuki Okada – Тhe Junior 3rd Rank the 3^rd Order of Merit, доктор по литература

Калиграфија:

Juzaburo Ushida – The Junior 4^th rank, 3^rd Order of Merit, the 4^th Class of Service Rear Admiral

-превод од старојапонски на модерен јапонски јазик:

Hiroshi Doi и Ashiya City (1 јануари 1998 год.)

– превод од јапонски на англиски јазик:

Tetsuyuki Ono и Takarazuka City (19 јуни 1998 год.)

– превод од англиски на македонски јазик: Данче Велов (20 февруари 2022 год.)