Што НЕ Е и што Е Реики-третман т.е. исцелителен третман со Реики енергија

извадоци од прирачникот за “Реики, Усуи Сенсеј и Спиритуалните учители“

• Што не е Реики-третман?

Една од најважните нешта за секој еден практикант на оригиналната Реики метода, Usui Reiki Ryoho е да научи и да сфати што не е и никогаш не беше спиритуално-енергетски третман со Реики-енергија. Некако, со текот на годините, поради недостиг од спиритуално образование и спиритуална терминологија во Македонија, увидов дека луѓето овде не разликуваат спиритуално-енергетски техники од различните форми на гатање, баење и дивинација. Иако во нашава држава ова многу и не се почитува: спиритуално-енергетските техники се изучуваат преку активно посетување соодветни семинари, предавања од одлични учители, искусни во тематиката и практика и образование преку читање и проучување многу различна спиритуална литература.

Прво мора да се разбере дека Спиритуалисти се оние луѓе кои се занимаваат со проучување, разбирање, манипулација и апликација на енергиите од кои е создадена планетава и Универзумот. И овде важно е да се разбере дека сите практиканти на спиритуално-енергетска метода треба да се спиритуалисти, не сите спиритуалисти практикуваат техники и методи. Мислам дека тука настанува проблемот. За да некој знае да бае, да гата, да гледа на нешто, во нешто, да прави магиски дејствија кои исполнуваат желби на не многу светол начин, да треба да има познавање од еден дел на спиритуализамот како генерализиран назив како би го повикал и употребил она што му треба за да ја исполни својата или туѓата намера или желба. Но ова не е техника, не е метода, не е систематизиран начин на повикување и канализирање на секогаш само еден исти вид на енергија, на секогаш еден и исти начин. Во спиритуално-енергетскуте методи и техники има наука, има уметност, има начин на живот, има структура, хиерархија, правила, прописи, доследност и посебно образование.

Затоа многу, многу пати нагласувам дека со Реики енергија е енергија. Со оваа енергија се исцелуваат болести, физички, психолошки и емоционални. И оние практиканти кои се обучени за тоа, тоа и го прават успешно. Реики енергијата не се комбинира со масажа, со баење, со гатање, со местење. Не дека не може, луѓето можат да прават што сакаат, но затоа и јас пишувам. Да знаете дека Реики е Универзумска енергија која е дојдена и се повикува за да се исцели нечија болест, ако е по Божја волја, не е масло за масажа и не може да се купи за 100евра.

Запомнете дека кога одите на семинари вие ниту ја купувате Реики енергијата, ниту способноста за канализирање и исцеление. Она што е Божје не може да се купи, само може да се добие на подарок од некого кој тоа го има веќе во себе како подарок. Не може учител да ти даде нешто што нема, па колку сака дипломи и сертификати нека има. На семинарите плаќате за времето на учителот и за парче штампана хартија. Но после…после треба да канализирате енергија која Усуи Сенсеј ја знаел како Реики.

Секако дека постојат прекрасни луѓе кои тивко добиле способност која како благослов се пренесува од колено на колено и навистина знаат и да баат и имаат визии за можна иднина. Но тоа не е спиритуално-енергетски третман. Едното се пренесува генерациски од колено на колено, а другото е соодветно школување. И затоа надокнадата за едното е различна од цената на третман.

Друга карактеристика по којашто се издвојува еден спиритуално-енергетски третман, без разлика дали е со Реики-енергија или некоја друга, е тоа што се работи тимски. Нам ни е потребно активно и секојдневно учество на клиентот во својот спиритуален раст и развој. Реики-Учителите никогаш не смеат сѐ да сработат за својот клиент. Додека работиме ние создаваме можност и услови клиентот сам да се исцели себеси и да си дојде до својот сопствен баланс, до своето сопствено нормално.

Реики-техниката не е чистење на кармички долгови. Значи нема за цел да ги отплаќа и спасува луѓето од нивните спиритуални долгови и последици на претходни одлуки, особено не ако клиентот не сака да се промени ниту во своето однесување, ниту во својот карактер. Со практикување на Реики-третманите нема пократок пат до просветление. Никогаш не ни постоело такво нешто! Токму затоа, Реики-третман нема цел, ниту пак може да ја промени судбината на клиентот.

Исто така, Реики-третман не е замена за лекарства препишани од психијатар или доктор, кои легитимно мора да се земаат поради присуство на болест или растројство. Дури во некои потешки случаи, спиритуално-енергетски третман е возможен само доколку клиентот редовно си ги зема своите лекарства.

И најважно од сѐ е дека Реики-исцелителот или практикантот, при самиот процес на исцеление ништо свое не смее да ви даде, ниту пак ваше да преземе. Ако случајно некој практикант кој ви вели дека практикува Реики исцеление и преземе нешто од вас или вие од него, тогаш тоа не е Реики исцеление, Реики енергијата е сама и секогаш еднонасочна!

• Што е Реики-третман?

Самиот третман на исцеление со Реики енергија е време кога вие седнувате на разговор со сопствената Душа и Спирит. Тоа е време за подетална интроспекција при којашто може да се види како и зошто е дојдено до точката до којашто се наоѓате во моментов. Кој сака, како сака нека ви го објаснува третманот со Реики-енергија, но кај вистински исцелител и спиритуален учител знајте дека вие стоите голи пред Бога! И ништо повеќе не е веќе скриено од пред спиритуалните очи на вашиот Учител.

Токму поради овие уникатни особини на суштината на Usui Reiki Ryoho, вистински Реики-третман не се случува на физичкото тело. Само ако навистина искрено барате исцеление и подготвени сте да направите сѐ што треба, каква било промена во вашиот живот и во вашиот карактер ќе се случи исцеление. Кога Реики-исцелител ќе ги положи своите дланки врз вас, ние канализираме чиста Светлина којашто не е наша, туку е највисока свесност којашто дава живот, а којашто вие ја барате и само ако ова е така, се случува исцеление.

Здравствените установи не го исцелуваат човека, го лекуваат до некој степен и потоа тој мора сам да се погрижи за себе. А кога не може човек сам да се погрижи за себе, а ги поминал сите болници, тука доаѓаме ние. Овде секако ја вклучуваме и примената на другите видови алтернативна медицина: хомеопатијата, разноразни холистични методи на исцеление, bowen-техника, рефлексологија. А можеби некому само му треба убаво истегнување и вежбање или малку физикална терапија. Но, сево ова не е спиритуално-енергетска метода. Спиритуалните методи на човек му даваат нешто што е над медицината. И токму поради ова, доаѓаме до конечно побивање на мислењето на оние кои двапати отишле на семинар (а може и никогаш не отишле) дека само медицински лица можат и треба да се бават со Реики-техниките.

Луѓето кои одат кај исцелител, никогаш немаат само физички здравствени проблеми. Иако постои закон во нашава земја што Реики техниката ја нарекува „метода и постапка за рехабилитација“, сепак она што ние го работиме е над било кој човеков закон и е чиста езотерија. Тоа е алхемија на дело и спиритуализам којшто надминува какво било човечко размислување и земен концепт. Едноставно, не може да стават во каква било законска рамка паранормални и психички способности на луѓето и Милост и Волјата на Елохим.

Намасте!